يمكن تكون حلوه....الدنيا
هاااي يا جماعة بقالي شهور مامسكتش قلم وكتبت.
المرة ده لا هتكلم عن الكلية ولا شارع...
أكيد كتير مننا اتعرض لمواقف اثرت في حياته و شخصيته...
ده مش كتير بس .. ده اكيد كلنا...
بس فيه كتير مننا بيتعقد من حاجة معينة في حياته وبيحلف عمره ما يقربلها تاني....
الكلام اللي هقوله مش كلام نظري لاني من الناس اللي اتعرضوا لموقف و الحمدلله فاقوا منه...
عشان تطلع من احساس الظلم اللي حاسس بيه لازم تفهم نفسك الاول ...تفهم حاسس بايه؟
و ايه هيريحك؟...ماتستناش حد غيرك يفهمك او ياخد بايدك...افهم كويس ان زي ما فيه وحش
فيه الحلو ...زي ما في حد ظلمك فيه حد نصفك او حد اكيد هينصفك(ان شاء الله).....
لازم تصدق دايما انك قوي و قادر تتطلع من اللي مضايقك...
وافهم كويس ان زي ما مشكلتك كبيرة
فيه دايما الاكبر منها عند غيرك و ان مش ده اكبر حاجة ممكن تتعرضلها...
عايز تعيش مرتاح....؟
افهم الدنيا كويس ...ليه دايما تبص لنص الكوباية الفاضية ما دام في نص مليان....
ليه تبص للي مضايقك ما دام فيه حاجه ممكن تفرحك او عالاقل ممكن حاجة تيجي تفرحك....
افهم ان كل تجربه بتدخلها لازم تديك خبره و هتقويك و توسع فكرك و نظرتك للامور....
ما تفقدش الثقة في نفسك عشان ماتخسرهاش...
لانك لو خسرتها مش هتعرف ترجعها كاملة...
و لو عند كل مشكلة شخصيتك اتغير جزء منها للاسوأ ..
هتيجي علي اخر عمرك مش هتعرف نفسك....
الانسان عقل و مشاعر ...
فكر بعقلك عشان تحافظ على مشاعرك صافيه........
معلش طولت عليكوا و كلامي يمكن مش مرتب ..بس انا كنت بكلم مع نفسي ..و فكرت افكر
بصوت عالي ...يمكن.. يمكن كلمه مني تساعد حد......
سلام
تــــوب عليـــنا يــــــــارب
هاااى يا جماعة المرة اللى فاتت كنت كلمتكوا عن مواضيع الكلية واللي بيحصل فيها ، المرة ده هكلمكوا في حاجة أكيد
كلكوا حسيتوا بيها وهى قلة الذوق بين الناس في الشارع الايام دى و كإنها مسابقة مين هيقل ذوقه أكتر و يكسب الجايزه....
وانا بقى هجيبلكوا الموضوع من الاول...
اللي بيحصل بالظبط:
اول ما تصحى مالنوم (لو انت من النوع المتفائل شوية) بتصحى الى حد ما متفائل او حاسس ان اليوم (احتمال)يكون حلو ....تغسل وشك و تلبس هدومك و تنزل الشارع....و هنا تبتدي اليوم او الحرب زى ما الناس تقريبا فاكرة ...
.لو انت مالناس اللي ربنا فاتح عليها و نزل بعربيتك بتفضل محتفظ شوية بالتفاؤل ده لغاية ما تطلع من الجراج (سوري....ده ان كان فيه يعني) ... تطلع عالشارع من هنا و تبتدي الاتاري بقى ...تلاقي الناس بتنط على بعضها بالعربيات و بيبقى نفسك وقتها تسمع حاجه للمطرب الشيعبي الاستاذ أحمد عدوية زي زحمة يادنيا زحمة او السح ادح امبو...
المهم ان كل واحد تلاقيه مستعجل كأن هو الانسان الوحيد اللي عنده شغل ..و اول واحد يزنق عليك بالعربية و لا حاجة بتقول في بالك معلش استحمله تلاقي مراته منكده عليه ولا حاجة ...بس المشكلة ان على اخر اليوم بتكتشف ان كل الناس تقريبا رايحين يطلقوا مراتتهم!!!!
اما لوانت بقى مالنوع اللي بياخد تاكسي ( مواصلة مفتخرة يعني) (المفروض)...اولا بتشاور للتاكسي اللي هو اصلا مافيهوش لا كراسي ولا بيبان ولا ازاز و يا دوبك فيه السواق(ده ان كان باين اصلا) ...المهم...تقولوه المكان اللي انت عايزه ..يا اما يطلع جدع و يوصلك (وهنا دور دعوة الام في الموافقة)....اما بقى لو ماوفقش فا بيحصل حاجة ماللي جاي:
يا اما بيسيبك ويمشي ساكت (كأنك كحيت في وشه بالظبط) بس برده في الحالة دة حظك حلو.
يا اما بيبصلك من فوق لتحت و كأنك اجننت وازاي تجرؤ تسأله عالمكان ده اصلا ...و يا سلام بقى لو كان نزل من غير مايشرب كوباية الشاي بتاعته هيبقى نهارك اسود و هينزل سيل مالشتايم مش هتلاحق عليه.....وكل ده ليه؟ متعرفش!!!
لا و اللذيذ بقى لو وقفت تاكسي مره و قلتله :عباس العقاد (مثلا) يقلك:حد يروح عباس العقاد (طب نفجره يعني ولا نعمل فيه ايه!!!!)
اما بقى لو انت بالاتوبيس فيا عيني عليك بجد..الناس بتبقى واقفه مش عارفه تفرد صباعها حتى..و تلاقيلك ناس بقى مطلعالك علب الكشري و بتاكل (لأ و ايه بمزاج )
و لو بقى ماشي على رجليك برده كارثة ..لو بنت مش هتسلم مالمعاكسات ...اااااه نسيت ..حتى لوانت ولد مش فارقه ...الايام ده مبقتش تفرق الكل بيعاكس بعضه (ما شاء الله) و لازم التعليق عليك او عليكي لاي سبب سواء حلوة او وحشة......
كل ده غير المعاملات الشخصية بين الناس بقت حاجه تحرق الدم....
من كام يوم وانا قاعده لا بيا ولا عليا اتبعتلي بالغلط رصيد على الموبايل ..عملت فيها البت الشاهمة و كلمت النمره اللي بعتتلي عشان اقولهم ...لقيتلك واحدة بترد عليا بقلة ذوق و كأني انا اللي بعته لنفسي(امال لو مكنتش اكلمت من نفسي كانت هتهدر دمي ولا اية!!!)..قولت ابقى ذوق للاخر ...بعتلها الرصيد و كلمتها عشان اطمن انه وصل(مكالمة من جيبي اهو) لقيتها متنرفزه اوي انه اتاخر عليها (اصحاب العقول...).....طبعا لا تعليق...
ده بقى بجانب انعدام الشهامة...الناس دلوقتي اما تشوف حادثه او خنافه ..تقولك هيييييييه خناقه تعالى نتفرج..!!!!!
و الله ما ينفع اللي بيحصل ده ما فيهاش حاجه لو اتعملنا على افتراض يعني اننا ناس زى بعض و كده....
ااااااه نسيت صاحبنا المتفائل اللي فالاول....بس خلاص بقى اكيد استنتجتوا اللي حصل...هيرجع البيت و غصب عنه تاني يوم هيبقى نازل الشارع زى الراجل اللي مراته منكده عليه عيشته....
يلا سلام
لنا الله على مانحن فيه
أول مشاركة ليا هعك كتير استحملونى بقى سورى :D
المهم عشان انا على اخرى بجد , كل يوم اروح فى كليتى أداب المانى حلوان
ولاحظوا كل كلمة من دول , أداب وألمانى وحلوان لأن كل واحدة فيهم لعنة عن التانية
نتكلم فى المانى دلوقتى ونسيبنا من الكلمتين التانيين شوية
من وانا فى اخر تانية ثانوى قررت ادخل المانى وفضلت ادعى لربنا ليل نهار يارب ادخلها لحد ما ربنا استجاب والحمد لله دى احسن حاجه حصلت فى حياتى بجد
المشكلة اننا بندرس مواد تعقد والله زى الحضارة الالمانية حيث التقدم بقى وبنشوف فى المنهج ده دنيا تانيه خالص من وجهة نظرى هى دى الدنيا الصح كل شىء مرتب حركة المرور, الشغل ,الدراسه فى انضباط رهيب انا مهما اوصف مش هقدر اعبر عن حالتى بجد ,انا للاسف بقيت افكر زيهم بشكل كبير قوى ووحسيت انى بدأت ابدل شخصيتى شويه شويه واحل صفات تانية منهم مكان صفاتى القديمة بقيت واحدة تانيه بجد اتغيرت 180 درجة, وصعب عليا افضل فى مصر مش قادرة اعيش فيها بمعنى الكلمة انا كل يوم بكرهها عاللى قبلو
جاتلى حاله من رفض عادتنا كلها ومش بقبل على نفسى انى اعمل حساب ليهم اصلا
حاسة ان اخرتى هتجنن واروح العباسية لحد ما اموت وولا هطول المانيا ولا النمسا ولا يحزنون
كفاية قوى كده لانى طولت بشكل غبى , بس عاوزه اقول حاجه الكلام ده بكتبو وانا كأنى بكلم نفسى بجد
زي ما تيجي......تيـجي
قعدت أفكر ممكن أول موضوع أكتبه يكون إيه؟؟.
أو إيه في حياتي بيحصل ممكن أتكلم عليه ...
لقيتني ما شاء الله مافيش حاجه في حياتي أتكلم عليها غيركليتي الجميلة اللي مشركاني في كل حاجة حتى نومي منها لله..
بالمناسبة القصص دى( تحت قبة كلية هندسة) وأكيد كلكوا هاتقدروا تفهموني....
قال إيه كان نفسى من وأنا في أولى اعدادي أدخل هندسة و لأجل الحظ الاسود ربنا إستجاب لدعايا (اللهم لا اعتراض).
.و يا ريت الانسان مننا بيتعلم... لكن إزاي .؟! لازم يبهدل نفسه ..
و رحت عمارة..
و هنا وصلنا لنقطة النهاية....
قال إيه.. أدخل الكلية من هنا ..يقولك عايزينك في تسليم بحث ....قلنا ماشي...
يقولك عايزينك تعمل بحث عن فرش البيوت(مالها الحصيرة و الطبلية)... قلنا ماشي...
قام معيد اتفضل بالشرح (و يا ريته ما عملها)يقولك ايه بقى :
دلوقتي في أوروبا و الدول المتقدمة التلاجات بتتوصل بالنت(اللي هو اصلا احنا لسه عارفينه بقالنا كام سنه وكل 100 بيشتركوا مع بعض لغاية ما السرعه بتوصل فسوة كيلو بايت )
المهم....يقولك التلاجه ده متوصلة بالسوبر ماركت اما بينقص منها علبة زبادي يجيلك عامل السوبر ماركت يقولك التلاجة بعتتلى اشاره ان في زبدية مش موجوده في التلاجة تقولش فليبينية في البيت (الله يرحم القلل)....المهم ..في الاخر بقى المعيد يقولك مطلوب ترسملي فيشةالنت بتاعة التلاجة بابعادها .....؟؟؟؟؟؟!!!!!!!كهربائية انا بقى.....
لكوا أن تتخيلوا واحده في موقفي ده تعمل إيه!!!!
لأ و الاخيرة بقى يقولك عندكوا نزول عشوائيات عشان نقيسها و بتاع... و يا سلام بقى على جمال ولا حلاوة
العشوائيات....ولا على الشيباب الامور على رأي اخونا اللمبي ....وده حاجه هنتكلم عليها بعدين....و الاطفال برده كان
ليهم دورهم....احنا و الحمدلله إتحدفنا بالبيتينجان..(آدي آخرت المهندسين)...لا و كله كوم و المواصلات كوم
تانى....مفيش هناك غير الميكروباصات اللي هي متفرقش كتير عن مراجيح مولد النبي....لأ و مش كده و بس ..يقولك قال
ايه خبطوا على بيت بيت(71 فدان في يوم و نص!!!!!) اسألوه عن عيلته و عن عدد ولاده اللي هو اساسا ميعرفش
عددهم....
يا جماعة نصيحه لكل شيب و كل فيتاه لا تنحرف و تتدخل هندسة وأقعدوا في بيتكوا جنب أهلكوا يراعوكوا و يخافوا عليكوا
أرحم...و يا ريت لو حد عنده طموح ا امل في حاجة يعنى مايتحمقش قوي لو ماجتلوش ....معلش طولت عليكوا بس من
حرقة دمي....
يلا سلام
